Monday, November 24, 2014

المفقود الموجود ؟

فلنقل جميعاً الحق كلنا بيبقا حولينا الناس للى بنحبهم ، وبكل بساطة ولا بنروح نزورهم ولا بنفتكرهم حتى 
يجى يوم وتيجى ساعة وتلاقى الناس دى فجأة ربنا أفتكرهم 
هوبا بقا تفتكر أيه بقا الناس دى قد أيه كانوا عظماء وقد ايه كانوا فجأة كده مهمين فى حياتك 
طيب هو مش حضرتك ممكن ببساطة كنت تعبت شوية وكنت شبعت من الناس دى وهى موجودة ، يعنى تكتر الزيارات ، او السؤال ، وبعدين هو مين قال أن موت الجسد هو المحطة الأخيرة ، طيب والروح دى طيب 
أفتكروا الناس اللى فى حياتكوا ببساطة لان هيجى وقت مش هتلحقوا تسلموا عليهم 

Saturday, May 3, 2014

ها رايح فين ؟

ديماً الطرق والأختيارات قدامك ساعات بتكون محدودة جداً ، ولما حد يسألك هتعمل أيه ، تقوله يعنى هاعمل أيه ما اديك شايف مفيش حاجة قدامى أعملها.

السيناريو التانى هو ان يكون قدامك كل الاحتمالات والطرق ، بس كتير زيادة عن اللزوم ، ولما برضه حد يجى يسألك تقوله ، اعمل ايه ماديك شايف من كتر الحاجات مش عارف اعمل ايه 

طيب والحل ؟ 

بكل بساطة وسهولة فى كلا الحالتين ، جرب كده تتمشى لوحدك وتاكل أيس كريم ، او تشرب حاجة سخنة او حاجة فريش انت بتحبها ، وتقعد فى مكان هادى ، وتسمع مزيكا حلوة انت بتحبها 

واسأل نفسك ، ها عايز تعمل ايه ؟

الأجابة صعبة 

اسأل نفسك كمان مرة ، ايه الحاجة اللى لو معملتهاش ولاقدر الله حصلى حاجة ، انا هاكون ندمان جداً ؟ 

فكر ديماً فى نتايج الطريق للى هتمشى فيه ، وهتلاقى نفسك اختارت الطريق بكل سهولة


متقولش اللعب ولا المذاكرة ، قول مستقبل لزج ، ولا مستقبل مشرق وواضح 

متقولش الشغل ولا الراحة ، قول النجاح والتقدم ، ولا افضل زى مانا مكان

متخافش من انك تاخد قرار ويطلع غلط 

صدقنى احسنلك انك تجرب وتتعلم من انك تخاف من التجربة ومتعملش حاجة 


ها رايح فين ؟


Saturday, April 26, 2014

الصمت

صرنا لا نتحدث ، هل هذا لاننا وبكل بساطة خائفون. هل صار الحديث وكلمة الحق ، او حتى الحديث الفارغ من اى معنى ، بل بالاحرى حديث التفريغ ، نتحدث حتى نفرغ ما بنا من طاقة ، هل اصبح كل هذا ممنوع فى وقتنا الحالى . 

اتذكر انه فى وقتاً ما صار الجميع يتحدثون ، من دون كللً او ملل ، يتحدثون وبكل طلاقة ، يسبون ويشتمون بأقذع الألفاظ ، متمردون على كل الأحول ، ولكن فجأة وبدون أى مقدمات صار الكل أخرس ، لا يتحدث ، ولا يسمع ، ولا يرى ، صرنا كالموتى الاحياء ( الزومبى) ، كل شى يحدث حولنا ، ونحن نتحرك فقط من أجل قضاء حاجاتنا الأساسية 

حالة البله التام ، والثرثرة الفارغة التى صارت تقتصر فقط على شاشات التلفاز ، وصار الكل يستمع فقط ، دون أبداء اى ردة فعل ، الأ تحويل القناة بعد الانتهاء من وصلة الثرثرة للتنقل الى فقرة اخرى ، ل شخص اخر يثرثر ايضاً ، وتستمر هذه المعاناة الى أن يأتى وقت النوم ، ليأتى صباحاً جديد وهلم جرا

هل هذا الصمت مجرد استعداد لما قبل الطوفان ؟ 
أم انه صمت القبور ؟ 

Wednesday, March 26, 2014

وماذا بعد ؟

كثيراً ما أضعت وقتى فى الحديث والدفاع عن ساسة ، أعتقاداً منى انهم وطنيون من جبهة الثورة والميدان 
وادركت تدريجياً أنه لا يوجد أى احد يستحق هذه المعاناة ، أستوعبت أنه ببساطة من يريد أن يعمل ويخدم الناس ، سوف يفعل ذلك دون السعى وراء أى منصب أو لقب 
كثيراً ما أرى شباباً يتبارى ويتسابق للحصول على لقب قائد او مدير مجموعة أو مسؤول عن شئ ما ، وكنت دئماً ما اردد جملة "الخدمة مش ب الأسم" 
وأدركت أن الشئ نفسه ينطبق على أى منصب ، إن اردت أن تخدم ، فأنك سوف تتحرك بألامكانات المتاحة لك 
ولم تنتظر لقب أو مكانة 
لذا لا تضيع وقتك فى الدفاع عن هذا أو ذاك ، او تتبارى لجلب أحد الى معسكرك 
بل أسرع ان تجمع حولك من هم مؤمنون مثلك بقضية ما ترى من خلالها أمل فى مستبقل أفضل لك ، وابدأ معهم للوصول الى ما تريد 
أخيراً " لاتنتظر احد ليحقق لك أحلامك ، بل أبنى أحلامك هذه بنفسك "

Friday, February 21, 2014

زمنهلبية ؟

عندما تشعر أنك لا تملك الشعور نفسه
صارت الأشياء حولك متشابهة ، تحتوى على نفس المذاق والرائحة
تستيقظ فى ذات الروتين 
تقرأ نفس الأخبار مع أختلاف العناوين
لاتعرف اين الصواب واين الخطأ
لا تدرك اى الجبهات هى التى يجب أن تنحاز لها
هل الدم الذى فى كل الانحاء من حولك هو مجرد زيف
كأنك فجأة صرت فى اللامكان واللازمان
لاوعيك يحاول أن يتدخل لينقذ ماتبقى منك
وعيك ذاته فقد الوعى
حولك العديد من المتناقضات 
تتسأل هل ما أنا فيه مجرد لعبة من ألعاب الفديو
او حلم 
ربما انها غفوة فقط
ستنتهى ، سأستيقظ ، سأفيق حتماً
ولكن متى وأين ؟ 

Sunday, December 22, 2013

حجرين

فرغت ما بداخلى من دخان لتخرج سحابة كثيفة أرى خلال ضبابها أشخاص أدرك فيما بعد أنى أعرفهم ، يخرج صوتى مشوشاً بسبب ما تبقى فى حنجرتى من دخان لازال يخرج ، ثم اتكلم فأقول : "مش لازم تفهمنا أحساسك وفكرك ، أنا فاهم اللى أنت عايز تقوله لانى كتير بكون عايز برضه أتكلم بس الكلمات مش مساعدانى" 
ولكنى لم أجد رد على ما قلت ، عندها أدركت أنى قلت هذا الكلام سراً . 
 عندما أجلس مع عقول تتهافت لتتصادم بعضها البعض فقط ليثبتوا لأنفسهم أن هذا العضو المعنى بالتفكير مازال يعمل ، هذا العضو الذى لم يتأثر بالتلوث الجوى ولا الدخان ولا الخمر ولا القمامة المتناثرة فى كل أنحاء المدينة أو حتى التى أشعر أنى اراها بوضوع تخرج من كلتا أذنين كل من يمروا امامى دلالة على أمتلاء جمجته بالفضلات ، أشعر إننا فى حاجة إلى برنامج كالذى يضاف للحاسوب حتى ينضف ما به دورياً .

"أنظر جيداً لنفسك فى المرأة لتتأكد أن أذناك مازلتا نظيفتان"
 

Friday, August 9, 2013

فاشل بالفطرة ؟؟

فى حاجة كده لذيذة ، الا وهى ان الكل هيشوفك فاشل وابن ستين لامؤاخذة فاشل لو مكنتش ناجح زيهم أو بالطريقة للى هما نجحوا بيها او بأسلوبهم .

الله أشمعنا انت يعنى اللى تبقا ناجح بطريقة غيرنا أحسن منا ف ايه يعنى عبقرى انت ولا ايه ؟؟ 

وهنا فى سؤال بيطرح نفسه هو مين المحترم اللى قالك ان مفيش للنجاح او للصح طريقة او درب الا للى حضرتك سلكته واللى حضرتك شايفه واللى حضرتك لا مؤاخذة لبسته وقعدت تمشى فيه ، وجاى عايز تلبسهونى برضه على أساس انه الاكلشيه المنزه عن الاخطاء والدليل الصحيح فى النجاح المليح .

يعنى بمعنى أخر هل حضرتك يامحترم تقدر تقولى مين اللى هيكسب لو سمكة دخلت مسابقة مع فيل على مين يتسلق جبل أيفرست ؟؟ 

ماهو بالديهى لو حضرتك أستخدمت نفس الاسلوب فى قياس ومقارنة كل الحاجات للى حواليك حضرتك هتفطس لان لو الفيل مقدرش يطلع ووقع على سعاتك هتروح فى خبر كان

حاجة تانى 
 ليه حضرتك مبتقدمش نصايحك من باب النصح مش من باب الألزام
ولو مش قادر انك تمسك نفسك عن إلزام الناس بيها 
خلى نصايحك السحرية السرية المهلبية دى لنفسك 
 
لان انا ايه للى هيلزمنى انى اعمل حاجة اساساً انا من طريقتك فى تقديمها تخلينى مقتنعش ولا بيها وبيك شخصياً !!

وبعدين فكرت حضرتك فى ان الناس للى حضرتك شايفهم فاشلين دول انهم هما كمان من وجهة نظرهم شايفينك فاشل ؟؟ 

تقولى الله ازاى ده انا ناجح ده انا وانا وانا 

اقولك حضرتك زى ماحضرتك شايف نفسك كده وشايف الناس اللى حواليك فاشلين لمجرد اختلافهم عنك فى الطريقة والطريق يبقا حضرتك بقا ليه مش مستنى انهم يقولوا عليك كده أشمعنا انت 

وبعدين النجاح حضرتك تعرف انه مش بيقاس بثوابت 
يعنى الراجل ده ناجح تلاتين كيلو ، البرنس ده فاشل تسعين جرام

يعنى عندك مثلاً حد زى "مايكل دل" وزى "سيف جوبز" وزى "غاندى" وزى " تشارلز ديكينز "

الناس دول فى منهم اللى مكملش تعليمه وفى اللى ظروفه كانت سيئة جداً 

وغيرهم كتير جداً أمثلة 

هل حضرتك تقدر تقولى مين من وجهة نظر حضرتك الناجح والفاشل 

عندك مثلاً من وجهة نظر ان الناس دول فى منهم اللى مكملش تعليمه ف ده فاشل !!

هل وجهة النظر دى تعقل !!

علشان كده متحكمش حضرتك على الناس وتطلق فى تبريرات لأحكامك ووجهة نظرك دى لان حضرتك مش شايف الصورة كاملة أو ع الاقل مش شايفها من وجهة نظرهم 


 

Tuesday, August 6, 2013

فى الميكروباص


هسألك سؤال ملهوش إى لازمة لو أنت واقف مستنى الميكروباص وجه الميكروباص فعلياً وفجأة سواق الميكروباص اللى انت ركبته ده توافته المنية يعنى من الأخر مات
السؤال جاى اهه 
مين اللى هيسوق الميكروباص ؟؟ 
هتقولى بالبديهى كده اللى بيعرف يسوق 
وممكن تقولى للى بيعرف يسوق ويكون أدرى واحد بالطريق 
طيب هل هترضى ان للى بيعرف يسوق ده وادرى واحد بالطريق ان وجد تسيبه يسوق الميكروباص ويحركه لو مثلاً مثلاً يعنى الراجل ده يختلف عنك عقائدياً 
بالديهى لو حضرتك حد بيفهم هتقول وانا مالى المهم المصلحة العامة وان الناس توصل انا ليا دعوة بأنه يخلينى أمن ويوصلنى بسلام 

طيب نفس ذات السؤال هنا لو مثلاً بدل التاكسى الحد ده هيكون مدير او قائد او محافظ او وزير او رئيس جمهورية 

هل حضرتك هترضى ولا لا ؟؟

 

Tuesday, July 30, 2013

حكاية ؟

فى يوم من الأيام كان فى عيلتين ساكنين قصاد بعض مستنين ولادة قريبة جداً ، جت ساعة الولادة راحوا نفس المستشفى اتولد ولدين دخلو الحضانة سوا وبعدها خرجوا واتربوا سوا ، العيلتين كل عيلة عقيدتها مختلفة عن التانية وافكارها كمان ، لكنهم مشتركين فى انهم بنى ادمين وبشر ، بيجمعهم كل ود وحنان بياكلوا سوا وبيلعبوا سوا 
ف يوم من الأيام جد جديد ، كل واحد اتعصب لفكرته ولمعتقده وقرر انه ياأما يقنع للى قصاده بالحاجة دى ياأما يخلص منه ، كل واحد فى الطرفين شايف نفسه الصح وشايف ان معتقده هو للى يستاهل ان الكل يتبعه 

بدأت المشادات الكلامية وبعدها الاثباتات بالدلاليل والبراهين التاريخية 

وهلم جرا 

بس فى يوم من الأيام جه حد خبط على باب العيلتين وقلهم انا محتاج اقولكم حاجة ضرورى فى وجودكم كلكم 
وبعد مالناس أتجمعت قالهم ياجماعة يوم الولادة وبعد مالولاد دخلوا الحضانة لما حضراتكم جيتوا تستلموهم كل واحد منكم أستلم أبن العيلة التانية وطلب منهم للتأكيد انهم يعملوا تحليل DNA وفعلاً عملوا التحليل وبعدها أكتشفوا فعلاً ان الولاد اتبدلوا 

كل ولد بعدها راح للكتيبة المنتمى ليها بالدم 

بس فكرياً وعقائدياً هيروح فين ، ياترى بعد مادافع عن أفكاره وعقيدته هيبيعها بعد كده علشان الدم 

طيب كان هيحصل ايه لو استمر الصراع ووصل لدرجة الموت ومفيش حد منهم عرف الاختلاف 

ماهو ساعتها مكنش حد هياخد فرصة يراجع نفسه ويفكر هل هو صح ولا لا ؟ 

ده بالظبط اللى بيحصل فى الواقع كل واحد متعصب لفكر او عقيدة مهما كانت ومصمم انه الصح ومش بيدى نفسه فرصة حتى يفكر

وبيقاتل اى حد مختلف وبيهاجمه من أجل انه يدافع عن الحاجة دى مع العلم ان طول ماهو مؤمن بأن الحاجة دى صح ومؤمن بقوتها ، أنعكاس أيمانه وانعكاس الحاجة دى على أفعاله وكلامه وتصرفاته هى اللى بتخلى للى حوليه يتسألوا ويحاولوا يعرفوا سبب جمال ونقاء الشخص ده ايه

"عمر ماكنت الحروب طريقة لنشر السلام والخير والمحبة"

"فكر تانى وراجع نفسك وشوف انت فين من القصة"

"الحياة دى فرصة انت اخدتها بدل ماتستغلها فى أنك تدور على الفروق ونقط الضعف 
أستغلها انك تدور على اللى يجمع ويقوى "

" جرب تحط نفسك مكان الناس ، جرب تشوف الحاجة بعنيهم وبعدها أحكم "


شكراً