إمبارح نزلت من بيتنا عادى جداً انا واخويا صاحب الستة عشر عاما
فى طريقنا الى رحلة طويلة لحضور فرح ابن خالى المقام فى احد القاعات على الطريق الزراعى على ما اعتقد المهم نزلنا فى فرح وروح مغامرة تغمرنا اننا نازلين سوا انا وهو وكان بقالنا فترة منزلناش سوا ركبنا الاتوبيس علشان نتوجه الى المحطة
ونحن فى الحافلة بدأ حوار بين شخصان فى منتصف الخمسينيات وفى منتصف الحوار تحولوا الى الحديث عن مايحدث فى البلد
1- ياخى واللى عايزين ينزولوا يوم تالتين دول
2- بتوع عمرو موسى والبرادعى وحمدين
1- ماهو عمرو موسى التانى اللى كان بينهب مع النظام القديم
دخل شخصاً اخر فى الحوار كان واقف اماننا يبدوا فى منتصف الثلاثنيات
3- يعنى مش عارف انا الناس اللى مش عايزة الاستقرار دول
واحد لسه فاتح محل جديد كل شوية الناس تروح تعمل احتجاجات عنده هيشتغل ازاى
2- ده غير المولوتوف واللى بيضربوه عند الاتحادية يعتصموا ليه وايه اللى يوديهم هناك
3- وبعدين ياخى ( بنبرة اشبه بالهمس الى شخص 1،2 )عارف من ايام حسنى مبارك قاموا بأعمال تجديد وتوسيع فى العباسية على نفقة الدولة ، ومتبناش كنيسة الرئيس لسه مديهم تصريح علشان يبنوا كنيستين يعنى الدنيا هتبتدى اهه مش عارف عايزين ايه تانى انا
وعندها بدأت فى التحدث لان الهراء بدأ يزيد عن حده
4- حضرتك من ايام حسنى مبارك لحد دلوقتى مفيش كنايس اتبنت ومصرفش على توسيع او على اصلاح حاجة وبعدين فين الكنيستين دول
3- فى مصر لو تعرف اى قسيس هناك أساله
4- ايوه فين يعنى فى مصر
3-وبعدين ياسيدى كل شوية احتجاجات لو حد فاتح محل جديد وعملتله كل شوية احتجاجات هيبنفع يشتغل
2- يابنى نسيبه يشتغل وبعدين نديله فرصة
3- فى محور قناة السويس دلوقتى ومشاريع تانى
4- حضرتك انا بتكلم عن الفساد اللى بيحصل والناس اللى بتموت
3- ايام حسنى مبارك كان بيجيلوا الاكل من فرنسا
4- ووزير الاستثمار لسه اكل هو وعيلته ب 33 الف جنيه على نفقة الدولة
3- شفت الفاتورة
4- وحضرتك شفت فاتورة حسنى مبارك
3- ايوه الحاجات دى مثبته فعلا
4- مثبتة فين اذا كان امن الدولة بتاع حسنى مبارك اخد برأة
2- انت اسمك ايه
4- بكل ثقة - أسمى بيتر
2- بس كده خلاص الحوار انتهى
4- يعنى ايه الحوار انتهى
2- يعنى خلاص بانت اتجاهاتك ونوياك
4- اتجاهات ايه
2- انت عايز تتخانق معايا يعنى - ويسحب يدى
4- حضرتك فين انا عايز اتخانق معاك
3- يجلس بيننا بعد قيام احد الركاب - يااستاذ كلمنى انا دلوقتى فى مشاريع وتنميه
4- يا استاذى فين ده على ارض الواقع ، فين والفساد هو هو
2- الى 1 ياعم دول المفسدين محدش كان بيسمع صوتهم ايام مبارك
4- حضرتك مين المفسدين وهافسد البلد ليه
2- عارف من كام يوم واحد مسكوه بيفضى عربية بنزين فى الصرف الصحى .. عارف اسمه ايه اقولك اسمه ولا بلاش
4- قول حضرتك اسمه ايه
2- اسمه مايكل
4- قلته وايه يعنى حرامى ومفسد يتمسك ويتحاكم
3- وبعدين اللى عايزين ينزلوا هتبقا فى مفاجاة عظيمة وان شاء الله احنا نازلين 30 ستة ، وهدفنا وهنادى بتطبيق الشريعة الاسلامية
ولسه هاكمل لكن ساعتها المجموعة دى نزلت من العربية
أنا من مكانى بشكر كل الناس اللى قدرت تلوث عقول البشر وتغيبها تحت اى مسمى
شكراً هدفكم قيد التنفيذ مصر تتحول وتدخل الى حقبة طائفية
إذا لم يتكاتف فيها من يريدوا بقائها
