بعيداً عن المص وال لوليتا ستايل اللى حاصل ده
وبعدياً برضه عن عته وجو الكارتون اللى بيحصل ف الاجتماعات الهزلية دى
إرتيها ؟؟
كلمة عامية مصرية دارجة بتتقال لما تكون فى حاجة سخنة وبالاخص مشروب
ف تتقال علشان تحاول تقلل درجة حرارة المشروب ده علشان تقدر تشربه بسهولة
ودى نفس الكلمة الأعتراضية اللى بقولها دلوقتى بعد المهاترات اللى بتحصل على موضوع سد إثيوبيا
طيب ببساطة ده .. لو انت عندك أمكانية انك تعمل مشروع يعيشك فى مستوى حياة كريم
والمشروع ده من حقك تماماً
هل لما هيجى حد يقولك لأ المشروع ده هيأثر عليا مش هتعمله ؟
اكيد هتشاور نفسك وللى حواليك وفى الاخر برضه مصلحتك أبدى
طيب ببساطة فى مشكلة .. والحل مش مسكنات ، الحل هوعلاج تام من المشكلة دى
والعلاج ده عايز كذا محور
اولهم اليقين والشفافية ان ده حق من حقوق إثيوبيا المشروعة
ثانياً حل اننا نضربهم عسكرياً كأنهم شوية غنم علشان مش متكأفئين عسكرياً معانا حل فاشى وفاشل تماماً دى لو دولة فى قوة إسرائيل او حليفة لدولة عظمى مكنش حد استجرى يتكلم على السد أصلاً
الحل هو اننا نتأقلم مع المشكلة ونتحرك فى كذا اتجاه
أولاً
ترشيد المياه واستخدام أساليب حديثة فى الرى بدل الهبل والاهدار اللى بيحصل
واستخدام مياه البحار فى الرى ومياه الصرف وده هيوفر من حصة المياه اللى بتضيع من النيل فى الرى
ثانيا
تقدر تجيب الدكتور فاروق الباز تستعين بيه وتشوف الأبحاث اللى عملها عن المياه الجوفية فى مصر وتديله امكانيات وصلحيات وتسيبه يشتغل
ثالثا
تساعد اثيوبيا على انشاء السد , ابعت مهندسين ومستثمرين ومصريين يهاجروا هناك حتى علشان تبقا عارف المياه بتروح فين وبتتوزع ازاى والية عمل السد شكلها ايه
رابعاً
استعين بمهندسين الرى والمهندسين الزراعيين اللى محدش عارف هما فين دلوقتى
طبعاً فى فوق الحلول دى مليون حل اقل حل فيهم ابرك من كل الكلام والهرى اللى اتقال فى الاجتماعات الصورية دى
بس للاسف مين يسمع
علشان كده
إرتيها
No comments:
Post a Comment