حكها هى كلمة ظريفة لطيفة أعتراضية يطلقها أحد اصدقائى تهكماً على موقف او فعل
وحكها يقصد بيها السيارة
لان فى عربيات بيبقا مكتوب عليها (هتحكها هجيبك تحتها )
وده تقريباً نفس رد فعل بعض الناس تجاه مواضيع معينة أو أفكار معينة
اخذين صورة هذا السائق المتهكم
للى بيهاجم وبيهدد حتى من قبل وقوع الفعل او الحدث
فى ناس كده بتحطلك خطوط حمرا وحواجز على حاجات معينة وتقولك المواضيع دى او الحاجات دى مفيهاش نقاش هى كده
لو مثلاً كلمته فى السياسة ، يقولك ياعم سياسة ايه وبتاع ايه بس احنا لاقيين ناكل
مع العلم انه لو جرب يحكى او يستفسر هيعرف انه مش هياكل ولا يشرب الا لما يفهم سياسة ، ولو كلمته فى حاجة ليها دعوة بالدين مثلاً ف يقولك لا يابرنس هى كده
فى حاجات مفيهاش كلام
طيب ازاى بدورى هاقتنع بحاجة وانفذها من غير مااعرف الحاجة دى ايه وليه.
أسلوب حكها ده أسلوب بينفذه معظم الشعب المصرى
وبيتنفذ بالتوالى والتتابع وبتدريج الهرم الطبقى،
يعنى كل طبقة بتحك الطبقة اللى أقل منها
وصولاً الى قاعدة الهرم
فالقاعدة دى من تعبها بتحك روحها
والحك ده أنواع وأشكال متعددة ، وللأسف صار علنى ومجهر وللاسف وصل لحالة الأعتياد ف بقى عادى ، عادى ان واحد ماشى بعربية يحكك ولا يحصل اى حاجة
عادى ان واحد ماشى ف شارع يتحرش بكل للى فيه بنات وولاد وممكن توصل للقطط
عادى ان مدير يطرد حد شغال عنده لان شكله مش عاجبه عادى ، عادى انك تاخد بالجزمة لمجرد انك قلت لا او مينفعش ، عادى انك تتشوه وتتكفر لانك جربت تفكر
عـــــــــــــــــــــــــــــــــــــــــــــــــــــــــادى
فنصيحة صغيرة منى
حك انت وابتدى تحك علشان متفضلش تتحاك طول عمرك
No comments:
Post a Comment